موتي خوفاً

خافي موتاً

احكي

قولي

اصرخي

صمتاً ... !


خوفك يقتل

صوتك يقتل

صمتك يقتل

موتك أيضاً

حقاً يقتل ..!

واه ياعبد الودود.. سايب ليه الحدود!

واه ياعبد الودود
سايب ليه الحدود
وبتخدم النظام ؟؟
وبتخدم ليه صحيح
في نظام فاشي قبيح؟؟
ومجلس فاسد جبان

أمك عتدعي عليك
لو يوم مديت ايديك
على شعب طالب سلام
اوعاك تضرب أخوك
لـَ تديب للي دابوك
الحسره والظلام
..........................

.................
واه يا عبد الودود
هقولك وأنت خابر ؟
كل الحكاية عاد
ولسه دم خيك
ماشرباش التراب
حسّك عينك تزحزح
يدك عن الزناد
خليك يا عبده راصد
لساعة الحساب
آن الأوان يا ولدي
ما عاد الاّ المعاد ..
تنفضّ الشركة واصل
وينزاحوا الشباب
!!!!
إن كنت ودّ أبوك..
أخزقلي عين أخوك
والأهل يبلّغوك
دميعاً السلام
------------------------
واه يا عبد الودود
كيفك وكيف زمايلك ؟
عسى الله مجرمين ..
خالك زناتي جايلك..
من ضمن المتدسوسين ..
واختك حرمت عليها
المشاوير الجديمة
غطت عينها ويديها
وخلاص صبحت عقيمة
ومحمّد شربجي
بجى أجدع بلطجي
ويقولّك شِد عزمك..
وأنشف يا اونطجي
ومنِهْنا القرايب
والعيلة والعوالة
عيبلغوك سلامهم
ولتمّة الزبالة
وآخر الكلام ..
نقولك في الختام
الله لعن بلدنا
بكلاب زيك تمام
والدك / حسن محارب
(غفير برج الحمام)

أحمد فؤاد نجم بتصرف انطون عياد (البداية لغاية الحسرة والظلام)
& الرائع  د/بشرى عجبان (باقى القصيدة)

....

الضرب جاي من فوق
والطعن جاي من تحت
انا عمري يوم ما بفوق
ولا عمري يوم ارتحت!
....الضرب رايح جاي
ازاي تفوق ...عيّط
ده الضرب لو في الحي
أحرم من الميت !
....الضرب لو مؤلم
اوعاك تقول واجع
لو الطريق مُظلم
ازاي تقول راجع ؟!
....
الضرب كان بالسوط
وبقوة الضارب
وانا كنت كاتم الصوت
والدمع كان غالب
..___

يُسمون مصر جنه !!

ياجنة الأوجاع
يامأوى للرعاع
ياللي شبابك ضاع
بين غزة واولاد عم
.....

ياللي جمالك قبيح
والجهل فيكي يصيح
دكتوره في التشريح
كيفك في شُرب الدم!
................

ياكافره باولادك
واهبه العدو زادك
صار أملي في بعادك
ياللي انتي راحتك هم
..................
يامؤمنه وكافره
خنقانا ومعافره
ومن الضلوع ضافره
شعرك يانبع الغم!
...............
ياعسكري إتأمّر
يالحيه بتكفر
ليبرالي يتمخطر
نفسي الجميع يتلم
.............

يامناره فين نورك
طب شايفه جمهورك؟
بتعلى ليه سورك
بيقولوا انتي الأُم!
...............

ياقمح مش مزروع
يافقير ومات م الجوع
ماتقولي ايه الموضوع
عسلِك ماليه السم!
.................

يانسر كـَل لحمي
ياوطن بيدبحني
دانا كنت يوم بحمي
مصنع وأرض ويَم

.................

ياعسكري بيضرب
يابلطجي بيضرب
ياحرامي قام يهرب
ياوطن معندوش دم
...................

ياعظيمه فين مجدِك
ياحاكمه فين عدلِك
ده لما ثار وِلدِك
الحُكم كان يُعدم!

...
انطون عياد

نسخه منك!

انا انت .. انت انا
الاختلاف شكل الوشوش
انا حد متعرفوش

بس تعرف؟

نسخة منك

غصب عني

غصب عنك

انا انت ..انت انا
بس لو نفس الظروف

انا انت..لما كنت هناك أسد
انت انا.. لما خفت بقيت خروف

ممكن تفتح عينك لحظه؟

اخرج برة الدايره وشوف

نفس السِحنه

نفس الحزن اللي فـ ملامحنا

ونفس البسمه ساعة ما إرتحنا

نفس شعورنا

وقت ما كان حد بيجرحنا

وقت ما كان الكون يؤمرنا

نفتح قُمقُم جني دبحنا

جني التفرقه والتمييز

لجل الدين واللون والجنس

عامل جوة الكون دهاليز

ونصب فخه لكل الإنس

لو كان الأقباط أغلبيه ماذا يفعلون بالأقليه؟؟؟

سؤال طرحته في جروب  ضد الأقباط السلفيين في مصر

لو كان الأقباط أغلبيه
ماذا يفعلون بالأقليه؟؟؟

 
ده مُلخص الإجابات واللي بتتناول الموضوع بإسلوب نقدي ساخر
مع كامل الإحترام للجميع

-خيالي يعجز الصراحة عن تخيل الاحداث . بس اللي اقدر ااكدة اننا كنا هنقرف المسلمين في عيشتهم زي ما بيعملو فينا دلوقتي

-هيباتيا كمثال . بس الانسان تطور والفعل الوحشي الي حد ما قل بقي الاضطهاد ياخد شكل شيك شوية بيبقي نفسي اكثر منة جسدي

-اللي ماسكين الكنيسة و اسلوبهم هيطلعوا عين اللي جابونا و هيكفرونا 

-كنت هتلاقي الانبا بيشوي طالع بيقولك غطو التماثيل زي ما الشحات بيقول وهتلاقي الانبا بولا عامل حلقات وبيروح جلشات صلح عرفي زي ما محمد حسان مابيعمل وشويه السلفيين المسيحيين كانو بردو هيجمعوا تبرعات للصومال ويطلعوه في مليونيات قبطيه للحفاظ علي مسيحيه الدوله و هيستغلوا بردو الدين في السياسه وهيطلع الانبا شنوده يقولك ان الانجيل شريعتنا ودستورنا واللي مش عاجبه يروح كندا

-كانوا هيقبضوا علينا ونضرب فى امن قديسى الدوله تحت رعايه اسقف التغذيب 

-مش هيترددوا علشان ينولوا ( الشهاده) وهايجاربو اللي مختلف معاهم وبردو هيبقي علماني وكافر .. وهيقيموا الحد يعني هو بطرس احسن منهم لما قطع ودن الراجل ولا احنا هنكون احسن من الراجل 

-وهتمشي في الشارع هتلاقي صلبان وهيطلعوا في البرامج ويقولوا ان احسن عصر للمسلمين علشان يعيشوا فيه هو عصر المسيحيه 

-   كانوا دبحوني

- نفس الخراء بس حدود حرق بدل القطع  

 -شوفوا تاريخ أوروبا وظهور الحركات الإصلاحية وأبرزها البروتوستانتية و في الأخر علمانية يا جدعان :))
"نحن لن نخترع العجلة"

- هتلاقى الستات المسلمين عاملين مظاهرات قدام الأزهر عشان عايزين مايبقاش فيه طلاق و جواز من اربعة.. و هتلاقى دينا مستضيفة الأنبا بولا على اغابى و هو بيقول ان من حقهم مايتطلقوش و لا جوزهم يتجوز عليهم

- اجراس فى كل مكان .......ولا لبناء الجوامع 

 -ما فيش لحمه عاديه بقرى 

-امواس الحلاقه تصبح فرض مش سنه  

- فى الصيام ماينفعش يجرحوا مشاعرنا و ياكلوا لحمة و هنقفل ماكدونالدز و كنتاكى طول الصيام و قدورة يتقفل فى الصيام الكبير 

-  كان زمان البطريرك هو رئيس الجمهورية
أو يوم ما نعملها مدنية، يبقى رئيس الجمهورية صبي البطريرك 

-نعمل نهضة العدرا فى الشارع و نقرف فى خلق الله 

- سيتم استنساخ نظام هيلاسلاسي في اثيوبيا في مصر , يعني برده سلفية

- الولاد المسيحيين يتحرشوا بالبنات المحجبين و يقولوا اصلهم مستفزين

-دعم الفول والطعميه ............للمسيحيين فقط 

-البيكون والهام كان هيبقي قسم مشهور قوي في كارفور 

-الاجازه الرسميه يوم الاحد............ والجمعه ساعة الصلاه تفتيش مفاجئ

- تركب تاكسى تلاقيه مشغل وعظة للأنبا بيشوى عن خطأ عقيدة المطهر فى الكنيسة الكاثوليكية و تدخل محل هدوم تلاقيه مشغل بولس ملاك

- جوائز حكومية لحافظي الكتاب المقدس، والمسلم اللي يحفظ الإنجيل نجيبه في التلفزيون ونحتفي بيه ونقول ده مثال المسلم الصحيح والوحدة الوطنية وبتاع

-هتبقي السنه كلها مليطه وقرف ماهي السنه كلها صيامات

-الضرايب هتتسمي عشور

- العيال تدرس اللغة القبطية فى المدارس و يحفظوا ألحان إسبوع الآلآم و يمتحنوا فيها
     
 -ميكروفونات في الشوارع تزعج المسلمين كلهم لصلوات الأجبية، ونوجهها على بيوتهم عشان نمعن في إزعاجهم

- اللغة القبطية كانت هتدرس في المدارس مكان العربي

- حان الان موعد صلاة الساعة الثالثه ....وعلى المقيمين خارجه سرعه التوجه الى داخلها

- هنضطهد الكاتوليك ونشتمهم زي ما بيحصل في الشيعة دلوقتي

-علم مصر كان هيبقي علية صليب او علي الاقل مفتاح الحياة الفرعوني
   
-نولع في بيوت المورمون في الشورانية بسوهاج 

-مصيف مارينا كان هيبقي اسمة مارينا برضة .

- هنهدم المعابد  .. اهدم اهدم كلها كفر ووثنية وتسكنها الشياطين

-القبض على سامح موريس بأعتباره هرطوقى وفرار شباب قصر الدوباره الى الجبال

-غلق قنوات معجزة و سات سفن و سات سفن كيدز

- فى الصيام لما نشوف بنت محجبة فى الشارع او راجل بدقن نبص له بقرف و نقول اللهم انى صائم

-اكتشافات زي بطيخه عليها اسم الانبا شنوده او بيضه مكتوب عليها الارصوذكسيه هي الحل

- المسلمين يعملوا سايت المسلمين متحدون و يقعدوا ينشروا حاجات عن خطف البنات لتنصيرهم

- نجيب جبرائيل يصرح ان الجزامع فيها اسلحة و لما الثورة تقوم يرشح نفسه للرئاسة و يقول انا ماقلتش كدة غير عشان اجميهم

-و يعملوا قناة الطريق الإسلامية و تطلع مذيعة منقبة تتكلم مع مراسلهم قدام جامع الفتح و يقعد يقولها الحقونا يا اخت اسماء الأقباط عايزين يحرقوا الجامع عشان ياخدوا اختهم مونيكا

-زكريا بطرس كان بعد الاستفتاء هيطلع يقول وقالت الصناديق للمسيح نااااااااااااااااااااااااعم

-كانت الاذاعة المدرسة هتذيع اجزاء من التسبحة قبل الطابور

-شعار الإخوان المسيحيين هايكون :"الرخاوة لا تمسك صيدا"

-شعار الإخوان المسيحيين ما جئت لالقى سلاما بل سيفا

-التسبحة اصلا لازم المسلمين يسمعوها كل يوم من ميكرفون الكنيسة

- اسامي الشوارع كانت هتبقي اسامي قديسين

-كنا هنقول علي اي حد مخالف اريوسين كبديل للفظ كفار

-مدينة كفر الشيخ كان هيبقي اسمها كفر القسيس وكمان شرم القسيس

- تلاقى مدرسة حامى الإيمان المسيحية.. سنترال الأربعين عذراء.. سوبر ماركت هلبيس و بستيس و اغابى
      
- اكبر محل ملابس رخيصه
التثليث والتوحيد ...ومافيش نور

- صورة مبني الكاتدرائية كانت هتبقي علي العشرة جنية

-كل اعياد القدسيسن كانت هتبقي اجازات

 

صُدفه رخمه

انا حد جه في الدنيا صُدفه

بس كانت صُدفه رخمــــــــــــــــــــه

صُدفه أسوأ من معادي

في المعادي ويّا نسمه

لما رحت لبيت أبوها

 ليا قالوا نصيب وقسمه*

زي لما الكون يعادي

 يوم ما  قسّم كيكته ليهم

 أما ليا ماكان فيه قِسمه*

زي حزن في يوم يجيني

 أو يزيل من وشي بسمه

زي حادثه في وسط شارع

برضه صُدفه , صُدفه رخمه

زي يوم ما قعدت أشخبط

جوه لوحه لقيتها رسمه

رسمه راسمه اللي في خيالي

شجره بحر وموج ونِسمه

فجأه ألاقي الموجه تقلب
جوه نفسي الحزن يغلب
هي صُدفه
بس خلت قلبي يتعب

ودّعت على وشي بَسمه
just صُدفه بس رخمــــــــــــــــــــــه

صُدفه خلتني أتولد
صُدفه تانية أتجلد

بتولد لجل اتجلد!
صُدفه رخمـــــــــــــه

صُدفه لما سنين تفوت
صُدفه لما في يوم أموت
صُدفه أبات جوه التابوت

تتعمل جنازة فِخِمه

صُدفه رخمه
صٌدفه اني أتولد 

ولما أموت بتبقى رخمه

 ...........
انطون عياد 19/7/2011

*قِسمه1 (المُخطط أو المُقدّر)

*قسمه2 (جزء أو قطعه)

حلم حياة!

الأوله أهوى
والتانيه قهوة
والتالته على سهوة
………….
الأوله أهوى السعادة
والتانيه قهوة سادة
والتالته على سهوة كالعادة
………………….
الأوله أهوى السعادة دلوني
والتانيه قهوة سادة وسقوني
والتالته على سهوة كالعادة ضربوني
…………………………
الأوله أهوى السعادة دلوني طريقها منين
والتانيه قهوة سادة وسقوني على العايشين!
والتالته على سهوة كالعادة ضربوني وكسروا العين
………………………………….​….
الأوله أهوى السعادة دلوني طريقها منين غُلُبت كتير مادلونيش !
والتانيه قهوة سادة وسقوني على العايشين .. على نفسي! وماموتونيش!
والتالته على سهوة كالعادة ضربوني وكسروا العين جريت أهرب مامشونيش!
………………………………….​………………..
الأوله أهوى السعادة دلوني طريقها منين غُلُبت كتير مادلونيش رسمت البسمه على حزني وداريت الآه
والتانيه قهوة سادة وسقوني على العايشين .. على نفسي! وماموتونيش! أتاري الموت ده جوايا وانا براه
والتالته على سهوة كالعادة ضربوني وكسروا العين جريت أهرب مامشونيش!فصار الموت أُمنيه وحلم حياه!
...................................
أحدهم

نفس هذه اليد!

نفس هذه اليد
نفس هذه اليد التي بحركة منها خدعت كثيرين
اليوم تظهر في حركة اخرى لتكشف عن انها ما حرّكتها سابقاً إحتراماً للشهداء ولكن استحمار للشعب الغلبان أبو ريالة اللي أول ما شاف الحركة الأولى ريّل
او لتخبرنا انه اقترب التوقيت الذي سوف تُرفع فيه نفس اليد بنفس الزاوية (90x45) لمزيد من الشهداء في طريقهم الى الإستشهاد

نفس هذه اليد التى بحركة منها أثرت عقول البُلهاء اليوم وبعد أن ظنت ان الشعب كله أبله!

تهدد!

تتوعد!

لتتبدد البلاهه من عقول الشعب وتظهر فى عجول المجلس
.......................................................
عفواً يامن ظننتم أن بيدكم حكم الشعب والحكم عليه بما لا يروق سواكم

عفواً يامن لم يمت لكم أخ أو ابن أو أب متأثراً بفعل حلمه بالحرية

عفواً يامن وقفتم حاجزاً أمام مطالب شعب

عفواً يامن لم تستحوا فأمرتم بالكشف على عذرية المتظاهرات

عفواً يامن أردتم ما لم يرِده الشعب

....
إنه زمن تُفرَض فيه إرادة الشعب  وتُنفذ رغم أنف الجميع.



وعن هذه اليد أقول
ياسيادة الفنجري لواء ان لم تستحي فإفعل ما شئت ياسيادة الفنجري لواء .... لامؤاخذه!

لا تكونوا خرافاً هذه المرة

لامؤاخذه!

لا تكونوا خرافاً هذه المرة
قبل ان اكتب حرفاً احب ان انوه
انا أُكن كل الإحترام لقداسة البابا كرجل دين
وإنما حين يقذف نفسه في دائرة لم تكن يوماً له
حين يتكلم في السياسة
فشأنه شأن كل من يتكلم في السياسة
لي الحق ان أنتقده
بالأمس كان السيد عمرو موسي في زيارة لقداسته والتي مُنع الصحفيين من حضورها
بعد خروج السيد عمرو موسى أشاد قداسة البابا بدورة ومواقفه تجاه الأقباط (ولا أعلم حقاً عن أي مواقف يتكلم قداسته!)
ما علينا
فرسالتي ليست لقداسته ولكن لأقباط مصر
فليُشيد البابا بدور السيد عمرو موسى هذا شأنه
ولكن ومع إقتراب الإنتخابات الرئاسية لا تسيروا وراء كل ذي عمة
لا تكونوا كقطيع غنم إذا ما أشار اليه راعٍ بعصاه تبعوه سريعاً دون تفكير
ليس الآن على الأقل
كلنا نكره السلفيين والإخوان لأنهم يسيروا وراء كل من قال بأن قال الله وقال الرسول
ألا ترون بأنكم تفعلون مثلهم؟؟!
انا لا أقلل من شأن قداسة البابا وأعلم ان له من المواقف الوطنية ما لا يمكن إنكاره
لكن في موضوع حساس كإنتخابات رئيس الجمهورية قد تكون له حسابات أُخرى
وقد تكون ليست في مصلحتنا كمواطنين مصريين
خلاصة الكلام سيروا وراء البابا روحياً ودينياً كما شئتم
ولكن حين يصل الأمر للسياسة ولإختيار مستقبل بلدكم لا تجعلوا من أنفسكم خراف
لا تكونوا قطيع غنم
سيروا وراء ضمائركم وعقولكم
فهي أدرى بمستقبلكم
لامؤاخذه!